اكَــطع الروح لأجلك وصله وصله

اكَــطع الروح لأجلك وصله وصله

واطلع اعيوني الك لو مره احتاجيت
لأن انتَ هلي وكل ناسي وروحي
ولأن كَـلبك سكنته وسويته اليه بيت
اذا تدمع حبيبي الطم ليل نهار
واذا تضحك اطش من الفرح جكليت
واذا صوتك اسمعه ما انوش الكَـاع
واكَـمز من فرحتي اذا ارتاحيت
احلفت ما اخلي عيني لغيرك تشوف
واكلب الدنيا هوسه اذا مريت
اذا مريت بيه بيه افرشلك ورود
ومراسيم بطبل بيك حييت
حبيبي سمي بأسم الله من تمشي
لأن الكون يهتز لو تمشيت
ولأني من هويتك لكَـيت نفسي
وعليك اركض مثل مجنون اجيت
نسيت الناس كلهة ونسيت دنياي
ومن شفتك اضن حتى اسمي نسيت
مثل شمعه معت وبيه ياكل نار
لمن شفتك دخت وبسرعه تبديت
عفت كلشي ورايه وصرت انت كلشي
ولأجل حبك هلي منهم تبريت
ولا اندم اذا لأجلك احركَـ الكون
وماهمني اضحي وشما سويت
قليله بحقك التضحيه يهواي
والف مره قليله اذا ضحيت
قليله العين اترسه ملح وتيزاب
اذا مره شعرت منك تخليت
واذا حسيت منك راح اروح بعيد
عساني بدونك يالحلو ماتهنيت
احبك حب ابد مامر على هالناس
ومثل حبك فلا بعمري حبيت
احبك حب احبك موت للموت
واضل اهواك حتى لو توفيت
احبك حب احبك موت للموت
ومن عمري لعمرك قرن خليت
احبك صافي احبك الك وحدك
وكتلة حب لأجلك آنه صفيت
احبك ما احب غيرك ولا اشوف
كأن بدنيتي بس انت ضليت
كأنك شجره بيك الثمره ياقوت
وآنه سنين المن بيك وتنكَـيت
كأنك طيف صرت انت لية
وحتى بحلمي انت لو مره غفيت
كأني مسودن وممسوس بحبك
ومثل جني غفل بيه تلبسيت
ماتطلع ولا اقبل يطلعونك
المرقين كلهم شما ترقيت
واذا حبك جنون احبك بجنون
واذا حبك كفر حبك اختاريت
اريدنك واريدك تبقى وياي
واشعلك العشره شمع لو بقيت
اريدنك عطر وتفوح من الثياب
واشمنك اذا ثيابي شميت
اريدنك رمش بالعين اشيلك
وكَـبل عيني تجيني اذا احتاجيت
اريدنك صدى لصوتي يالمحبوب
وكَـبل نداي تحضر لو ناديت
اريدنك جرح بالكَـلب تنزف دوم
وتلجمني اذا حسيت بيه شفيت
اريدنك تصير الشوكَـ والذكرى
اذا مره حبيبي للماضي اشتاكَـيت
اريدنك لحن بحزن صوت الناي
وبمواويلي اسمعك اذا ونيت
فخر حبك حبيبي ارفعت بيك الراس
وبين الناس آنه بحبك اتباهيت
سميتك عشكَـ ومن الطفوله اهواك
وكبرت بحبك آنه وبيك اتسميت
سميتك ثقه وكل الوفى واخلاص
او ولا فد يوم ياروحي شكيت
سميتك لغز وبيك كومه اسرار
وبأسرارك آني وبحبك تخبيت
وبعد كَـلي حبيبي كَـلي شأسميك
بوصفك وبجمالك والله احتاريت
شوصفنك اذا انت اصعب سؤال؟
وآنه سنين اجاوب بيك ماحليت
راح اسكت حبيبي والسكوت اعجاب
لن خلصن الحروف وبحبك اخرسيت